Lunglei-a Mizoram State University dah tura ruahmanna thar siam turin Mizoram sorkar phut: Assembly Session hmasa ber ngaichang dawn

by News Editor

Tualchhung News

ZORAM TODAY| 31st October, 2025: Nimin-a Mizoram State University Demand Committe, Lunglei a thukhawm chuan Mizoram Sorkarin Mizoram State University din tura ruahmanna alo siam tawh chungchang ngaihtuahin, Sorkarin Mizoram State University Bill a lo pawm tawh chu Assembly Session hmasa berah ngaihtuah nawn a, Mizoram State University chu Lunglei-a dah tura ruahmanna thar siam turin Mizoram sorkar an phut.

Demand committee chuan, October ni 10, 2025-a Higher & Technical Education Department in notification a tih chhuah danin, Mizoram State University din turah Government Aizawl College-ah Social Sciences, Government Aizawl College & IASE-ah Humanities and Education, Goverment Zirtiri Residential Science College-ah Science, Government Hrangbana College-ah Economics & Management, Mizoram Engineering College, Lunglei-ah Engineering & Technology zirna hawn tum a ni, an ti a.

Lunglei MZP leh MSU telna Demand Committee chuan, ''Heng zirna hrang hrangte hi Lunglei leh Chhim lam a College-ah te hawn theih vek a nih bakah Aizawl-a College awm sate leh Mizoram Engineering College Lunglei te pawt khawma ruahmanna siam anih avang hian Mizoram State University hi Lunglei-ah a din theih ngei tih a lang chiang hle ah a ngai,'' an ti.

"Chu mai ni lovin Lunglei-a College awm sate leh Chhim lam- Hnahthial, Lawngtlai, Siaha leh Chawngte-a College te hmang tangkaiin Mizoram State University hi a din theih tih a lang chiang hle," an ti bawk.

Demand Committee chuan, zirna in sang tak tak te awmna sa Aizawl-a Mizoram State University hi dah lovin District hnufual zawk te’n zirna kawng a hmasawnna an neih theihna atan Mizoram State University hi Chhim lam tan Lunglei-a dah tur leh, ruahmanna siam tawh chu Assembly Session hmasa bera ti danglam turin Mizoram Sorkar a phut, an ti a.

"Assembly Session hmasa berah ruahmanna awm tawh sa hi tih danglam a nih leh nih loh Demand Committee chuan a ngai chang dawn a, ruahmanna tih danglam a nih loh chuan a tul angin hma a la chhunzawm dawn a ni," tiin an tarlang.

Mizoram State University Lunglei-a dah a nih theihna atan Mizoram State University Demand Committee chuan Chhim lam mipui, zirlai leh pawl hrang hrangte bakah a bik takin kohhran hrang hrangte thlawpna a ngen bawk thu thuchhuah ah tarlan a ni.